CAGAYAN DE ORO CITY – Wala matago sa City Local Environment and Natural Resources Office ang ilang kadismaya sa daw inotil nga trabaho sa Mines ang Geo-Sciences Bureau -10 pag-abot sa kampanya kontra illegal mining activities sa bukirang kabarangayan sa dakbayan.
Kini human nakasaway si CLENRO officer Engr Armen Cuenca sa pagpasagad sa maong buhatan aron proteksyonan batok sa kadaot ang kinaiyahan.
Gihimong pananglitan ni Cuenca ang pagkasikop sa usa ka operator nga walay gihimo ang MGB bisan kon miangkon na kini sa illegal mining activities sa pipila ka hinterland brgys sa syudad sa miaging tuig.
Nabuhi ang isyu sa illegal mining tungod sa expose ni Opol Mayor Jay Bago nga pipila sa ilang opisyal sa lungsod ug kabarangayan ang mismong utok sa maong kalihukan.
Samtang gihagit ni MGB 10 regional director Felizardo Gacad Jr si CLENRO officer Engr Armen Cuenca nga pamatud-an ang iyang mga pasangil batok sa ilang buhatan pag-abot sa isyu sa illegal mining operations sa syudad.
Kini ang tubag ni Gacad sa dismayadong pahayag ni Cuenca sa maong hisgutanan.
Siya miingon nga kon dunay problema si CLENRO angayang mo-diretso kini’g dalikyat sa iyang opisina aron mapangita’ag sulbad kon unsa man ang kaligutgot niini sa MGB 10.
