CAGAYAN DE ORO CITY – Gipanganti sa City Local Environmental and Natural Resources Office o CLENRO nga manubag ang ilang empleyado nga gigamit sa interim officials aron sudlan ang buhatan sa Cagayan de Oro Water District o COWD.
Kini human kompirmaha ni CLENRO manager Engr. Armen Cuenca ang ilang empleyado nga si Freegie Padinit kinsa information technology o IT expert ang nakit-an sa nag-viral nga video sulod sa COWD office sa miaging Hunyo 24 sa kagabii.
Miingon si Cuenca nga tungod sa pagsanong ni Padinit sa sugo ni interim COWD General Manager Fermin Jarales,dili na usab kini ma-renew sa iyang trabaho isip job order worker sa city govt.
Dugtong niini,gitahasan ni City Mayor Rolando ‘Klarex’ Uy ang CLENRO nga mohimo’g patas nga imbestigasyon kabahin sa pagkalambigit sa empleyado city hall sa isyu nga daw gilungkab ang buhatan sa COWD.
Kini ang gipalanog nga mensahe sa iyang tigpamaba nga si Janboy Actub kabahin sa maong isyu.
Miingon si Actub nga sayo pa aron hukman nila ang maong empleyado rason nga angay nga duna una’y detalyado nga resulta sa imbestigasyon.
Giangkon usab sa city govt nga nakurat sila sa maong hitabo.
Una usab niini,naglipay na’g komento si regular general manager sa COWD nga si Engr. Antonio Young sa isyu sa lungkab ug giklaro usab niini nga wala siya pugngi ngam makasulod sa trabaho bisan work from home order sa interim officials.
Sa pikas bahin,gitambagan ni kanhi City Mayor Oscar Moreno ang interim board of directors ug interim general manager nga kuhaon ang serbisyo ni regular Young.
Kini tungod kay dako’g matabang sa si Young pag-abot sa aspektong teknikalidad sa COWD operation.
Miingon si Moreno nga dili angay sirad-an ni Jarales ang pultahan apan magtinanabangay sila ni Young pagsulbad sa mga problema sa maong ahensya.
