CAGAYAN DE ORO CITY – Obligasyon sa City Local Environment and Natural Resources Office o CLENRO nga mamintinar ang maayong kahimtang sa estado sa kolombarium sulod sa city memorial park sa Sitio Bolonseri,Brgy Camaman-an ning syudad.
Kini ang rason nga gihingusgan nila ang tipik sa kamanduan ni City Mayor Rolando ‘Klarex’ Uy nga dili tugtan ang mga mangduaway nga makadala sa posporo ug lighters aron kalikayan nga magusbat ang postora sa multi-million redevelopment project sa maong menteryo.
Gipasabot ni CLENRO manager Engr Armen Cuenca nga may giplastar na nga dagkutanan sa kandila ug lahi usab ang dakong krus sulod sa menteryo aron mapasayon sa mga mangduaway.
Siya miingon nga maoy gilikayan nila nga modikit ang mga kandila sa pintal sa kolombarium nga mohatag sa dili na hinoon maayong tan-awon niini.
Gihimo ni Cuenca ang pagpasabot kay dunay pipila ka nangduaw nga wala masayod sa bag-ong kamanduan alang sa maong lubnganan.
Hisayrang CLENRO ang gitahasan sa pag-mintinar sa kahapsay ug kahusay sa city memorial park nga gilauman mahingpit ang pagkahuman tuig 2025 gamit ang 400 milyones pesos nga bank loan sa syudad.
