CAGAYAN DE ORO CITY – Gitugtan sa city hall pinaagi sa buhatan sa CLENRO ang pagputol sa pipila ka karaang mga kahoy nga dugay nang nagbarog sa parke sa Magsaysay,Divisoria ning syudad.
Kini ang katin-awan ni CLENRO manager Engr Armen Cuenca isip tubag sa pagkuwestiyon sa local historians kon nganong giputol ang mga kahoy sa maong parke samtang gitukod ang bag-ong Operation Kahusay ug Kalinaw o OKK.
Miingon si Cuenca nga naghatag na sa peligro ang maong mga kahoy rason nga gitugtan nila ang kontraktor nga mopu-o niini.
Una nang gipamugos ni local historian Engr Raul Ilogon nga dili basta-basta maputol ang mga kahoy nga anaa gipangtanom sulod sa mga parke.
Samtang gikuwestiyon bisan ni Moreno ang pagtugot sa city govt nga pamutlon ang pipila ka karaang mga kahoy nga nagbarog sulod sa Magsaysay Park,Divisoria ning syudad.
Kini samtang gitukod ni City Mayor Rolando ‘Klarex’ Uy ang balor 20 milyones pesos nga OKK Resilience building sa maong lugar.
Namahayag ang kanhi mayor nga dili madali-dali ang pagputol ilabina sa mga kahoy nga kabahin na sa kasaysayan kon walay igong pagtugot sa DENR ug ubang ahensiya sa gobierno.
Siya miingon nga may mga higayon nga dunay gipaputol niya nga pipila ka kahoy kaniadto apan nangayo kini’g pagtugot sa hingtungdang mga buhatan sa kagamhanan.
