CAGAYAN DE ORO CITY – Dili angayang basulon ang liderato ni City Mayor Rolando Uy apan mismo ang mga kakulangon kanhi Moreno administration ang manubag kabahin sa isyu sa basurahan sa Brgy Pagalungan ning syudad.
Kini ang tubag ni City Local Environment and Natural Resources Office o CLENRO manager Engr Armen Cuenca nunot sa sulti ni kanhi City Mayor Oscar Moreno nga posible sila manubag sa Ombudsman.
Kini tungod sa giingong pagpasagad sa engineered garbage facility sa dakbayan.
Miingon si Cuenca nga dugay ra unta nga ”fully functional” ang basurahan kon gisunod pa sa kanhi administrasyon ang iyang rekomendasyon sa pagdumala niini.
Dumduman nga mi-esplikar na ang CLENRO sa show cause order nga gilugwa sa DENR-EMB 10 kabahin sa nadiskobreng mga kasupakan sa city government sa pagdumala sa waste materials.
Hisayrang si Moreno ang nagbutang kang Cuenca sa CLENRO sa miaging mga katuigan.
