Hugot ang panawagan sa buhatan sa City Local Environment and Natural Resources Office o CLENRO sa tanang Kagay-anon nga magsaulog nga may kaakuhan alang sa hustong paghipos sa ilang mga basura atol sa pagpahigayon sa month-long Higalaay Festival.
Matod pa kay CLENRO Manager Bing Mabilen, ilang gihangyo ang matag usa nga dili magpataka og labay ug sigurohon nga ibutang sa saktong bins o dalhon ang mga basura sa haom nga labayanan.
Pahimangno pa sa opisyal, gikinahanglan gayud ang kooperasyon sa matag molupyo tungod kay dili magmalampuson ang selebrasyon kon mahimong hugaw ug gubot ang palibot sa syudad human sa mga aktibidad.
Sa katapusan, gipasiugda ni Mabilen nga pinaagi sa aktibong pag-apil sa katawhan sa pagpanalipod sa kinaiyahan, masiguro ang mas hinlo, malipayon, ug hapsay nga pagsaulog sa Higalaay Festival.
