Gilusad na sa City Local Environment and Natural Resources Office (CLENRO) ang dry run sa paggamit sa gas analyzer.
Namahayag si CLENRO environmental officers Jessa Mhay Dagcuta nga gitumong ang kalihukan aron masuta ang lebel sa aso nga gibuga sa mga gasolina nga motorsiklo ug sakyanan.
Gitin-aw ni Dagcuta nga kinahanglan dili mulapas sa 2.5 carbon ug 1000 hydrocarbon ang maximum allowable emission levels nga ginasukod sa gas analyzer sa tambutso sa mga sakyanan.
Kini nga lakang kabahin sa ilang paningkamot nga mapalig-on ang kampanya batok sa smoke belching ug sa proteksyon sa kalidad sa hangin sa dakbayan sa Cagayan de Oro.
Pinaagi sa maong makina, mas sayon ug mas tukma ang pag-assess sa tambutso sa mga sakyanan nga posibleng makadaot sa palibot.
Giklaro ni Dagcuta nga dili pa mahimong isyuhan sa OVR (Offense and Violation Receipt) ang mga driver nga makalapas niini, tungod kay wala pa kini nahimuan sa ordinansa.
Apan, kung ang gamiton nga makina alang sa diesel engines sama sa mga depampasaherong jeep, pwede na kini himuon nga basehan sa ilang existing nga mga regulasyon.
