CAGAYAN DE ORO CITY –Nakaalerto ang multisectoral task force sa Department of Agriculture o DA-10 sa pagseguro nga dili makasulod ang African Swine Fever sa rehiyon.
Kini human gibulgar ni Dept of Agriculture Sec William Dar nga adunay mga baboy sa piggeries ang nagpositibo sa ASF.
Sumala ni DA-10 regulatory division chief Juliet Araos nga hugot nga gimonitor sa Regulatory Law Enforcement Council nga gilangkuban sa Bureau of Animal Industry, health department, National Police, local governments ug uban pang ahensiya ang lihok sa imported meats sa mga pantalan ug tugpahanan.
Kahinumduman nga ang Northern Mindanao ang ikatulo sa pinakataas nga hog production sa tibook nasud. Samtang gihupay ni Araos ang kabalaka sa katawhan nga matakbuyan sa ASF.
Giklaro ni Araos nga dili matakbuyan ang tawo sa ASF ug mao lamay maigo niini kadtong mga binuhing mga baboy.
Bisan niini,nagpahimangno gihapon ang regulatory division chief nga lutuon pag ayo kung uganing mokaon sa karneng baboy.
