CAGAYAN DE ORO CITY – Gikalipay sa pipila sa walo ka convicted criminals nga na-release sa prisohan tungod sa Good Conduct Time Allowance o GCTA nga ibalik sila’g bilanggo.
Kini bisan nga nasilbihan na nila ang katuigan diin sila gisilotahan sa balaod haom sa salaod nga ilang nahimo gikan sa lain-laing probinsya diin sila nagsumikan dinhi sa rehiyon.
Gibutyag sa Bombo Radyo ni Police Regional Office o PRO-10 spokesperson Lt Col Mardi Hortillosa nga nag-surender ang maong mga binilanggo kanhi tungod sa mando ni President Rodrigo Duterte gumikan sa kontrobersya sulod sa Bureau of Corrections o BuCor.
Namahayag si Hortillosa nga may uban usab sa maong mga piniriso nga naglisod pa’g baton sa pletehan aron lamang makaabot sa kapolisan aron mo-surender.
Una nang gibutyag sa PRO-10 nga naghulat na lamang sila nga ilugwa ang mando sa Camp Crame aron ipanghatod ang maong ex-convicted criminals padulong sa government jail facilities partikular sa Davao Penal Colonoy (DAPECOL) sa Davao Region.
Nasuta nga upat sa mga mi-surender ang gikan sa Bukidnon,duha sa Lanao del Norte,tag-usa sa Iligan City ug Camiguin.
Nag-atubang maong convicted criminals sa kasong pagpatay, pagpanglugos, rape with robbery, robbery with homicide and rape ug arson.
Samtang gipamugos sa usa sa mga author sa GCTA law nga dili mahimo nga makapahimulos sa balaod ang mga konbiktado sa heinous crimes.
Sumala ni Cagayan de Oro 2nd District Rep. Rufus Rodriguez nga kinahanglan gayud nga ibalik sa bilangguan ang GCTA beneficiaries nga nag-konbikto sa dagko nga kaso.
Siya miingon nga bug-at nga kaso ang malambigit sa droga, pagpanglugos ug pagpatay hinungdan nga angayan nilang serbisyohan ang bugti nga silot niini.
Una nang nabulgar ang kontrobersya sa GCTA human nahimong usa sa mga benepisyaryo niini si convicted rapist ug murderer si Former Calauan, Laguna Mayor Antonio Sanchez.
