CAGAYAN DE ORO CITY –Tangtang na sa quarter finals ang defending champion Team USA sa 2019 FIBA Worldcup didto sa China.
Kini human natala ang dakong upset sa kasaysayan sa basketball dihang gipildi sa Team France ang Amerika sa final score 89 batok 79 sa ilang dula kagabii.
Gipanguluhan ni Evan Fournier ang Pransya sa iyang 22 puntos ug Rudy Gobert nga mitunol usab sa 21 points aron pildihon ang tanang NBA players sa team Amerika.
Naguba sa Pransya ang lig-ong depensa sa Amerika hinungdan sa hingpit nilang kaparutan.
Nasayang lamang ang 29 puntos ni Donovan Mtichell sa Team USA gumikan sa ilang pagkatangtang sa torneyo.
Tungod niini,ikasangka sa Pransya ang laing powerhouse team Argentina alang sa semi-finals sa ugmang adlawa.
Ikadula usab sa Amerika ang Serbia alang sa consolation round sa torneyo.
Samtang gidawat sa Samahang Basketbol ng Pilipinas o SBP ang pagluwat sa pwesto ni Yeng Guiao isip head coach sa Philippine men’s basketball team.
Ang pag-resign ni Guaio nagsumikad sa napakyas nga kampanya sa Gilas Pilipinas sa 2019 FIBA World Cup diin wala silay naangkong kadaugan sa lima niini ka mga dula sa torneyo.
Gipasalamatan ni SBP Pres. Al Panlilio si Guiao sa tanan niining kontribusyon sa Gilas Pilipinas.
Una niini, gibutyag ni Coach Guiao nga dakong kasinatian ang pagtudlo kaniya isip head coach sa Gilas nga misugod sa 2018 Asian Games sa Indonesia.
Gitin-aw niini nga miluwat siya sa katungdanan aron mahatagan kagawasan ang SBP sa pagpili sa mahimong bag-ong head coach sa national team.
Subling namahayag si Guiao nga iyang giangkon ang responsibilidad sa kapakyasan sa Pilipinas sa FIBA World Cup.
