CAGAYAN DE ORO CITY – Gitahasan karon sa konseho ang National Bureau of Investigation (NBI-10) pag-imbestigar batok sa grupong gitawag nga Marfox nga giingong nagpadagan sa online investment scam batok sa mga senior citizen sa syudad.
Kini human gi-isnab sa maong grupo ang imbitasyon sa komitiba sa trade and commerce sa konseho aron mohatag unta katin-awan kon nganong dili sila angay silotan sa akusasyon nga nalambigit sa ilegal nga kalihukan.
Namahayag si Kagawad George Goking kinsa chairman sa komitiba nga namatud-an nila sa pasiunang imbestigasyon nga dunay gihuptang business permit ang maong kompanya sa pagtinda sa herbal products ning syudad.
Apan sa pasangil sa duha sa mga senior citizen nga nangayo’g tabang sa konseho,gisaysay nila nga gipa-invest sila sa laing online investment nga sukwahi sa permit nga gipangayo gikan sa gobierno sa maong grupo.
Nadiskobre nga anaa sa 25 milyon pesos ang nawala gikan sa maong senior citizens nga nabubo nila sa maong investment pinaagi sa usa ka wala una hinganli nga aktibong pastor sa relihiyon.
Gibutyag ni Goking nga hatagan pa gihapon nila’g higayon ang maong grupo aron maka-esplikar batok sa gisudlan nga pasangil niini.
Gitahasan sa CdeO city legal office ang NBI-10 sa pag-imbestigar sa maong fund scam aron manubag kadtong mga tawo nga dunay nahimong salaod batok sa kagamhanan.
Abli usab ang mga mikropono sa Bombo Radyo alang sa mahimong tubag sa grupo nga gialegahan sa maong pasangil.
