CAGAYAN DE ORO CITY-Gikonsiderar sa Department of Agriculture o DA-10 ang pagpahigayon sa cloud seeding operations sa mga lugar nga apektado sa El Niño sa Northern Mindanao.
Kini aron matabangan ang mga mag-uuma nga apektado sa grabe nga hulaw.
Gibutyag ni DA-10 Regional Director Carlene Collado nga ila usab gikonsiderar ang pag-instolar sa solar-powered irrigations sa pipila ka lugar sa rehiyon.
Apan gitin-aw niini nga ila pang sutaon ang mahimong tinubdan sa suplay sa tubig ayha himoon ang plano.
Samtang nagpahimangno ang Department of Health o DoH-10 sa publiko nga likayan ang pakigdasok sa daghang tawo ning panahon sa ting-init.
Si DoH-10 spokesperson Dr. Dave Mendoza miingon nga sagad makuha ang viral infections sa mga pampublikong lugar.
Gipahimangnuan usab niini ang publiko nga i-mintinar ang pagpanghugas sa kamot ingon man pagkaligo aron makalikay sa mga sakit.
Dugang niini nga batasanon usab ang pag-inom sa daghang tubig aron makalikay sa heat stroke.
