CAGAYAN DE ORO CITY – Seryoso ang findings sa Commission on Audit ug maka-disturbo sa publiko kon tinud-anay ang gisulti ni Local Water Utility Administration o LWUA chairman Ronnie Ong kabahin sa mga operasyon sulod sa Cagayan de Oro Water District o COWD ning syudad.
Kini human unang nagtoo si Ong nga pinakarason nga supak ang COWD sa LWUA takeover kay dunay mga kuwestiyonable nga transactions nga gi-red flag sa COA sukad tuig 2018 hangtod 2022.
Namahayag si kanhi City Mayor Oscar Moreno nga angayang hulaton ang katin-awan sa COWD ngadto sa LWUA kabahin sa maong expose.
Siya miingon nga dunay tulubagong sibil ug kriminal kon mapamatud-an ang COA findings.
Una niini,gi-interbyu si Ong sa usa ka Manila based TV program kon kumusta na ang isyu nga giatubang sa LWUA kabahin sa kahimtang sa COWD ning syudad.
Siya mitubag nga subay sa COA findings,nagkupot na sa 5.2 bilyones pesos nga lugi ang ahensiya samtang wala pa’y labot niini ang mga pagpangutang sa minilyong pondo nga gipangbalhin sa lain-lain nga bank accounts.
