CAGAYAN DE ORO CITY- Dismayado ang City Comelec Office sa minus nga turn-out sa mga kandidato nga tuyo magpapili sa lain-laing posisyon sa Brgy ug SK elections sa Mayo 14 ning tuiga.
Kini human wala makaabot sa 500 ka kandidato kada-adlaw ang moduso sa ilang sertipiko de kandidatura sa piliay sa brgy.
Miingon si City Election Officer Atty Ramil Acol nga unta dili maglangan-langan ang kadtong mga indibidwal nga intresado sa magpapili samtang may igong panahon pa.
Gihatagan lamang sa Comelec kadtong mga buot mo-kandidato kutob Abril 20 ning tuiga aron makaduso sa ilang certificate of candidacy o COC.
Anaa sa 3-mil ka kandidato ang gilauman sa Comelec nga moduso sa COC ning semanaha aron pilian sa 300-mil ka rehistradong botante ning syudad.
Samtang sukwahi dinhi sa syudad,mas daghan ang prospect candidates nga nakaduso sa ilang kandidatura sa nagkadaiyang opisina sa Comelec sa Misamis Oriental kagahapong adlawa.
Kini human kapin 2-mil ka botante ang nakaduso sa ilang sertipiko de kandidatura aron magpapipili sa Brgy ug SK elections sa Mayo 14 ning tuiga.
Miingon si Provincial Election Supervisor Atty Carlito Ravelo nga sama sa apelar ni City Election Officer Atty Ramil Acol,dili na hulaton sa mga personalidad nga tuyo magpapili nga maupos pa ang gisitar nga mga adlaw alang sa COC filing.
Nasayran nga anaa sa kapin 400 ka brgy ang gihuptan sa lalawigan diin dili tiaw ang pagsusi sa mga dokumento niini pag-abot sa central office sa Comelec.
