CAGAYAN DE ORO CITY – All set na mohatag sa hugot nga seguirdad ang Cagayan de Oro City Police Office o COCPO sa publiko nga aktibong mo-obserbar sa pagbalaan sa semana santa ning syudad.
Kini human isulti ni COCPO spokesperson Lt Col Evan Viñas nga anaa sila sa heightened alert status tungod sa gilauman nga pagdagsan sa katawhan sa mga simbahan ingon man pilgrimage sites sugod sa adlaw’ng Huwebes padulong sa Biyernes Santo.
Partikular gitumbok sa opisyal ang libuang mga deboto nga moduaw sa bukid sa Malasag sa Brgy Cugman ug kapilya sa Berhin sa Guadalupe nga natung-an sa Brgy Tablon,Agusan ug Balubal ning syudad.
Siya miingon nga apil usab nga hataga’g hugot nga seguridad ang ubang vital installations nga sagad dagsaon sa mga tawo nga naglakip sa mga pantalan,terminals,mga mercado ug sa beaches sulod sa semana.
Gilauman usab ang paghatag sa Police Regional Office 10 sa dugang puwersa sa pagsiguro nga ma-obserbar sa ensakto pagbalaan sa mga mahal nga adlaw.
Hisayrang gawas sa Malasag ug Guadalupe sa syudad, pabiling dagsaon usab sa mga deboto ang tinuig nga Panaad sa Camiguin ug ubang pilgrimage sites sa Misamis Oriental ug ubang bahin sa Northern Mindanao region.
