CAGAYAN DE ORO CITY-Gipasalig sa Cagayan de Oro City Police Office o COCPO nga walay cover-up o pagdupa kon ugaling tinood nga extra judicial killings o EJK ang motibo sa natigayong misencounter sa duha ka pulis sa Brgy Puerto sa syudad.
Kini human unang gibutyag sa pipila ka testigo nga gipusil sa naka-motorsiklo nga suspek ang tricab driver nga namasayhero sa maong lugar.
Miingon si Police Lt Col Mardi Hortillosa,tigpamaba sa Cagayan de Oro City Police Office o COCPO nga gitahasan nila ang City Internal Affairs Services o CIAS aron mag-imbestigar sa pagsuta sa tinood nga motibo sa kremin.
Giangkon ni Hortillosa nga maoy nagpinusilay sila si Police Staff Sgt Arman Tagolimot gikan sa Provincial Intelligence Branch sa Misamis Oriental PNP ug Police Master Sgt Jose Ryan Sevillano sa Puerto Police Station kay walay mag-ilhanay.
Una niini,gibutyag sa testigo nga unang gipusil sa naka-motorsiklo ang tricab driver diin pulis ang gitumbok nga namusil hinungdan sa misencounter ni Tagolimot ug Sevillano.
Samtang gisugdan na sa Misamis Oriental Provincial Police Office ang imbestigasyon sa misencounter sa duha ka pulis nga nagresulta sa pagkaangol sa upat ka sibilyan sa Brgy. Puerto ning syudad.
Miingon si MisOr Provincial Police Office Director Police Col Rolando Destura nga gusto niyang mahibal-an ang kinatibuk-ang detalye kon nganong miresulta sa pagpinusilay ang duha ka mga pulis ug nakasibat ang wanted person nga target sa operasyon.
Asoy niini nga dakong kasaypanan ang gihimo sa mga pulis ilabina nga susama sila nga nagserbisyo sa gobyerno.
Nagpaalim sa ospital ang duha ka mga samarang pulis nga si Tagolimot ug Sevillano.
Samtang nagtoo ang Police Regional Office o PRO-10 nga lack of coordination ang hinungdan kung nganong nagkapinusilay ang duha ka pulis nga nagresulta sa pagkaangol sa upat ka sibilyan sa Brgy. Puerto ning syudad.
Matud ni PRO-10 spokesperson Police Lt. Col. Surki Serenias nga mohimo usab sila sa parallel investigation tungod kay adunay mga sibilyan ang naangin sa operasyon.
Asoy ni Serenias nga taliwala nga ‘in good faith’ ang gihimo nila ni Tagolimot ug Sevillano sa maong lugar aron pagsikop sa usa ka wanted person.
Apan tungod kay adunay mga sibilyan ang naigo sa mga saag nga bala,kinahanglan usab sila nga manubag.
Kahinumduman nga naangol sa mis-encounter sila si Jaymar Canencia, Mary Ann Ordaña,Darlene Eduave ug Elenita Salinay.
