Gisugdan na sa Cagayan de Oro City Police Office (COCPO) ang mas hugot nga peace and order drive ilabi na sa mga dagkong barangay sa syudad.
Gikompirmar ni COCPO Spokesperson Captain Emilita Simon nga unang gipahigayon ang kalihukan sa Barangay Lapasan, usa sa mga lugar nga giila nga taas ang insidente sa krimen, labi na karong holiday season.
Gibutyag ni Simon nga ang tanang police operations ug regular nga aktibidad sa komunidad mao’y direktang mando ni City Police Director Colonel Dexter Paje, aron masiguro nga magpabilin ang kalinaw ug kahapsay sa tibuok Cagayan de Oro.
Gipangayo sa kapulisan ang aktibong pakig-uban sa tanang Barangay LGU pinaagi sa koordinasyon sa lokal nga PNP units, ilabi na sa ilang mga security teams ug peace and order committees.
Unang namatikdan sa BOMBO NEWS TEAM nga anaa nay presensya sa mga pulis nga galibot suroy sa mga dagkung malls, parke ug mga tunghaan.
Hinoon, gipakalma ni Simon ang kabalaka sa publiko kung nganong daghan pulis ang gakatag sa syudad kay kini nagpakita sa seryosong paningkamot sa COCPO nga maprotektahan ang katawhan ug malikayan ang krimen samtang iselebrar sa syudad ang mga dagkung aktibidad panahon sa pasko.
