Gipadayag ni COCPO Spokesperson PCAPT Emilita Simon nga padayon ang koordinasyon sa kapulisan ug mga barangay alang sa hugot nga implementasyon sa kampanya sa DILG batok sa mga tawo nga half naked, manigarilyo, ug moinom og ilimnong makahubog sa mga pampublikong lugar sa Cagayan de Oro City.
Matod pa niya, dili na kini bag ong lakang tungod kay adunay na existing ordinansa ang syudad nga nag regulate sa maong mga aktibidad. Gipadayon lamang ang mas istriktong implementasyon pinaagi sa memorandum gikan sa city director ug station commanders.
Dugang pa ni PCAPT Simon, nakig coordinate ang kapulisan sa mga barangay aron mas mapadali ang pagpatuman sa ordinansa, ilabina kay sila ang mas nakaila sa ilang hurisdiksyon ug sa pamatasan sa mga residente.
Sumala sa COCPO, sukad Abril 8 nagpadayon ang operasyon nga nagresulta sa pag isyu og mga ordinance violation receipt ug pagpasidaan sa mga molapas, isip kabahin sa padayon nga kampanya sa disiplina sa publiko.
