CAGAYAN DE ORO CITY – Milusad sa close-door meeting ang tanan hepe ug intelligence group sa COCPO ug Highway Patrol Group-10.
Matud ni Col Gilbert Lopez, hepe sa HPG-10 nga gitumong ang panagtagbo aron sutaon kung unsa na ka grabe ang insidente sapagpangarnap sa mga salakyan sa syudad.
Gi-awhag ni Lopez ang pagpalig-on sa intelligence monitoring sa mga kapulisan aron paspas masulbad ang mga kaso.
Ila usab gikonsiderar ang pagmugna sa usa ka task group aron tutukan ang ihap sa mga kaso sa carnapping nga hangtud karon wala pa masulbad.
ORAGNIZED CRIME GROUP
Samtang, nagnegatibo ang syudad sa Cagayan de Oro sa mga organized crime group sa carnappers.
Gikompirmar kini ni Lopez sa pakighinabi sa Bombo Radyo.
Si Lopez miingon nga mga “small time” lamang nga mga kawatan ang sagad mobiktima sa mga tag-iya sa motor ug uban pang pribadong sakyanan.
Gani, nagtuo si Lopez nga wala pay nakasulod nga gang sa carnappers sa syudad dili sama sa uban bahin sa rehiyon sa Amihanang Mindanao.
Una niini, gidayeg ni Lopez ang mga police stations nga naningkamot sa paggukod sa mga karnaper sa syudad, ug malampusong nauli ang mga sakayan sa mga tag-iya.
LIFE STYLE CHECK
Dili pa siento-porsiento nga luwas ang mga kapulisan sa life style check nga gimando ni Pres Rodrigo Duterte.
Sa bahin sa Highway Patrol Group, gi-una nila’g bisita ang mga dagkung opisina sa kapulisan ayha ang mga gagmay’ng istasyon.
Gibutyag sa hepe sa HPG-10 nga wala pa nila malukop sa suprise inspection ang uban hilit nga mga police headquarters.
Hinoon, iyang gikompirmar nga may napadala nang mga resulta ang ilang buhatan atol sa ilang gilusad nga ocular inspection batok na sa pulis nga gikulang sa mga papeles sa ilang gimanehong sakyanan.
Tanang resulta ipadala sa Kampo Crame para sa ebalwasyon.
