Gipasalig ni Cagayan de Oro City Police Office Spokesperson Police Major Emilita Simon nga dili gayod patolan o tabonan sa ilang buhatan ang duha ka pulis nga giakusahang nang-molestya sa ilang mga intern tungod kay personal kini nga sala ug lapas sa balaod.
Labot niini, gitataw sa opisyal nga ang maong gawi kaugalingong desisyon sa mga suspetsado ug dili kini nagrepresentar sa kinatibuk-ang pagpangalagad sa kapulisan sa dakbayan.
Gumikan sa maong panghitabo, gipahugtan sa pamunuan ang ilang mga patakaran ug aksyong disiplina aron masiguro nga walay makalingkawas sa tulubagon.
Busa, kinahanglang atubangon sa mga gitudlong sakop ang tanang silot ug sangpotanan sa ilang gihimong binuhatan kon mapamatud-an nga nakasala sila sa gihan-ay nga imbestigasyon.
