Gigarantiya sa Cagayan de Oro City Police Office (COCPO) nga ipatuman nila ang pinakataas nga alerto alayon sa pagbukas sa Pasko de Oro Activities, unyang gabie.
Gikompirmar ni COCPO spokesperson Police Captain Emelita Simon, nga wala nila gipakilid ang tanan klase sa hulga ug mga impormasyon, ilabe nga mismo si City Mayor Rolando Klarex Uy ang mihangyo sa pagdelatar sa selebrasyon tungod sa iyang nahuptan nga impormasyon.
Sa pagkakaron, nagdumili una sa pagtubag si Simon kung unsa nga grupo sa terorista ang gustong muguba sa kalinaw sa syudad.
Igong kooperasyon sa katawhan ang gipanawagan sa kapulisan, samtang nagkaduol ang selebrasyon sa Pasko ug Bag-ong Tuig.
Sa pagkutlo ning balita, mas gipalapdan pa sa COCPO ang ihap sa ilang mga roving personnel ilabe na sa mga peak hours, sa tungang gabie, hangtud sa kadlawon.
