Aminado ang pwersa sa Cagayan de Oro Police Office nga dakong hagit kanila ang pagmentinar sa hapsay ug kalinaw sa dakbayan samtang magpabilin ang kasadya ug kamahinungdanon sa kapistahan sa patron sa syudad matag Agosto.
Gipadayag ni COCPO spokesperson PCAPT Emilita Simon nga bisan pa man sa mga hagit sa mga posibleng matang sa kriminalidad nga mo-take advantage sa ka-busy sa kapistahan, gipasalig nilang ilang pugngan ang bisan unsang kakulian nga mosuway ug guba sa mahinungdanong kalihokan sa dakbayan.
Tungod niini, gipasabot sa opisyal nga makawang lamang ang tanang paningkamot sa kapolisan kon walay gipakitang kooperasyon, koordinasyon, ug partisipasyon ang matag usa.
Mao nga gihangyo pag-ayo sa kagamhanan ang pakigtambayayong sa publiko aron mamentinar ang seguridad ug mahimong malampuson ang tibuok saulog sa Higalaay Festival ning tuiga.
