CAGAYAN DE ORO CITY-Gipasiguro sa Cagayan de Oro City Police Office o COCPO nga mahatagan sa igong pagbantay ang mga lugar diin daghan ang tawo nga modagsa ning syudad.
Kini human gi-target sa suicide bombers nga maong mga lugar nga sabwagan sa kagubot pinaagi sa pagpabuto’g mga bomba.
Miingon si City Police Director Sr/Supt Nelson Aganon nga pabiling walay direkta nga bahad sa pagpamomba nga nadawat ang syudad apan gisiguro lamang niini ang depensa aron dili malutsan ang seguridad alang sa katawhan.
Makita sa daghang pampublikong lugar ang gatusang kapolisan aron ilikay sa kadaot ang katawhan kontra terorismo.
Samtang gihagit ni Aganon ang kapolisan nga likayan ang pagkalambigit sa tanang illegal nga kalihukan nga makaapektar sa ilang propesyon.
Gihimo ni Aganon ang pasidaan tungod sa unang 15 ka pulis gikan sa lain-laing probinsya ning rehiyon nga giwad-an sa trabaho gumikan sa mga kasupakan sa balaod.
Miingon si Aganon nga dili sayon ang pagpulis hinungdang likayan nila ang paghimo’g mga binuang aron di mag-antos sa kalisod ang ilang mga pamilya.
