CAGAYAN DE ORO CITY – Dili magpa-apekto ang liderato sa Cagayan de Oro City Police Office o COCPO sa kontrobersya nga gilambigitan ni PNP chief Dir Gen Oscar Albayalde sa isyu nga giduphan niini ang ninja cops sa nasud.
Kini human unang giakusar ni retired PNP-CIDG head Gen Benjamin Magalong nga gipugngan ni Albayalde nga tangtangon sa pagka-pulis ang 13 niya ka kauban nga mi-recycle sa 200 kilos nga shabu sa nadakpan nga Chinese druglord sa Pampanga sa tuig 2013.
Miingon si COCPO Director Police Col Henry Dampal nga nakurat kini sa pasangil batok Albayalde apan gipaniguro niini nga anaa sa taas nga morale pa gihapon ang kapolisan sa syudad.
Mihangyo usab si Dampal nga suportahan ang kapolisan sa syudad bisan sa pagsulay nga giatubang sa ilang kadagkaun sa Camp Crame.
Samtang gihagit ni Citizen Watch for Good Governance o CWGG covenor Atty. Antonio Soriano nga huptan una ang mga ebedensiya ayha ibulgar ang pangalan sa suspected ninja cops nga lambigit sa ilegal nga droga.
Kini human unang nanganti si Pres Rodrigo Duterte nga ibulgar niini ang dul-ag libo ka pulis nga nalambigit sa shabu recycling pagbalik niini gikan sa iyang state visit sa Rusya.
Kini sa tuyo nga dili maigo sa trial by publicity ang pagbulgar sa pangalan sa mga pulis nga nalambigit sa hinangal.
Miingon si Soriano nga angay kasuhan usab ang maong mga pulis kon ugaling tinud-anay nga anaa sila sa ilegal nga kalihukan.
