CAGAYAN DE ORO CITY – Gipanganti sa Cagayan de Oro City Police Office o COCPO ang dinalian nga pagsulbad sa kamatayon sa negosyanteng Israeli national nga gipusil sa wala mailang mga suspek sa 11-20th Streets,Brgy Nazareth ning syudad sa.
Kini human nakaangkon sa unom ka samad ang lawas sa biktima nga si Reuven Baranovitch,hingkod ang edad ug dugay nang nagpuyo dinhi sa dakbayan.
Gibutyag ni COCPO spokesperson Maj Evan Viñas nga maoy sugo ni City Director Col Aaron Mandia ang pagsulbad sa sunod-sunod nga pagpamusil-patay sa upat na ka sibilyan dinhi sa syudad.
Gani,giingong may person of interest na nga gisundan ang COCPO nga hayan utok sa kamatayon sa maong biktima.
Samtang misamot ang nerbyus sa pipila ka grupo sa mga negosyante tungod sa sunod-sunod nga pagpamusil nga natigayon sa syudad.
Gibutyag ni Antonio Uy, presidente sa Misamis Oriental Filipino-Chinese Chamber of Commerce and Industry Incorporated nga dili malikayan nga may epekto usab ang krimen sa dagan sa negosyo sa dakbayan.
Hinoon matud ni Uy nga malaumon gihapon sila nga masulbad sa labing dali nga panahon ang mga krimen sama sa gidangatan sa biktima nga si Israeli national Reuven Baranovitch diha sa Brgy Nazareth ning syudad.
Sa pikas bahin,ggi-depensa ni Nazareth PoIice Station commander Maj Allan Cairel ang laing pagpamusil-patay nga natigayon ubos sa iyang area of responsibility.
Gibutyag ni Cairel nga tungod sa kakulang na sa numero sa mga pulis nga mobantay sa populasyon sa syudad,naglisod sila sa pagpugong sa mga indibidwal nga dunay tuyo sa paghimo’g kremin.
Nagsilbing ikaduhang dakong kremin sa iyang hurisdiksyon ang kamatayon sa Israeli national kay sa miaging Disyembre,gi-ambush patay usab ang medical director apan paspas lang hinoon nadakpan ang mga kreminal.
