CAGAYAN DE ORO CITY – Nangayo’g hustisya ang pamilyang Epanes sa city govt pinaagi sa kapolisan nga mapadali ang pagdakop sa mga suspek nga mipatay magtiayong Galpo kuyog ang duha nila ka anak diha sa Sitio Sumpong,Brgy Indahag ning syudad.
Kini ang hangyo sa amahan nga si Jojo Epanes ngadto kang City Mayor Rolando ‘Klarex’ Uy nga personal mibisita sa mga biktima samtang gipahiluna sa punerarya sa dakbayan kagahapon sa buntag.
Miingon si Epanes nga subay sa sulti sa kapolisan,dunay foul play ang kamatayon sa magtiayong Melgene ug Manilyn Galpo kay mga may samad ang ilang mga ulo samtang nalumos sa baga nga aso sa gisunod nga balay ang ilang anak nga 4 ug 7 anyos sa miaging gabii.
Giapil usab pagpatay sa mga wala ilhing mga kriminal ang igsoon ni Manilyn nga si Maggie Epanes nga dunay gihapo’y anak apan atua sa ilang ginikanan sa Camiguin.
Subay sa crime scene,posibleng patay nang daan ang mga biktima ug tinuyo nga gisunog ang ilang balay sa wala pa masuta nga motibo.
Samtang gilayong gitahasan ni City Mayor Rolando ‘Klarex’ Uy si City Police Director Col. Salvador Radam nga dinalian mahatagan sa kasulbaran ang kamatayon sa lima ka sakop sa banay diha sa Brgy Indahag.
Kini aron makab-ot ang hustisya nga gipangita sa pamilyang Galpo ug Epanes nunot sa hitabo.
Miingon ang mayor nga angayang mataral sa hukmanan ang mga tawo nga mihimo sa kremin aron mahiluna ang mga kalag sa mga biktima.
Una niini,gisugyot sa mayor nga ipaubos sa cremation ang mga biktima aron mahiusa ra nga ihaya sa city memorial chapel nga libre ug kay ang syudad ang mobayad sa tanang galastuhan.
Dugtong niini,giporma sa Bureau of Fire Protection o BFP ang usa ka task force aron masuta ang nag-unang motibo sa mga kriminal nga pagpatay ug gilayong gisunod ang lima ka sakop sa banay.
Una nang giila ni Senior Fire Insp Sam Velarde sa BFP City Fire District ang magtiayon nga sila Melgene ug Manilyn Galpo nga gipatoo sa mga suspek nga namatay sa sunog sa miaging gabii.
Apan daan nang nagduda ang mga imbestigador nga tinuyo ang kamatayon sa mga biktima kay nagbaton sila sa mga bun-og ug narekober usab ang ubang mga ebedensiya sa kremin.
