CAGAYAN DE ORO CITY – Gi-depensa sa Cagayan de Oro City Police Office o COCPO kon nganong wala pa gihapo’y klaro nga kalambuan o sulbad ang pagpusil-patay kang Carmen Brgy Kag Roland Sherwin ‘Tawee’ Uy sa ilang kuwarehan sa Brgy Pagatpat ning syudad sa miaging Nobyembre 2021.
Kini human mas una pa nga dunay dakong kalambuan ang kasong pagpatay ang hospital medical director Dr Raul Winston Andutan Jr nga sa milabay’ng Disyembre lamang nahitabo.
Gibutyag ni COCPO spokesperson Maj Evan Viñas nga wala katulgi ug pasagdi sa SITG ang maong kaso ug padayon ang ilang pag-imbestigar aron masulbad ang kamatayon ni Uy.
Mitanyag sa minilyong salapi ang pamilya Uy ug ang city govt ingon man ang pribadong sektor aron ikasulbad pagdali sa maong hitabo.
Samtang dunay gamay’ng koneksyon ang kasong pagpusil-patay kang Uy ug Andutan nga pulos natigayon sa syudad sa miaging tuig.
Miingon si Viñas nga gihulat nila ang resulta sa mga imbestigasyon sa duha ka kaso aron ma-establisar ang posibleng koneksyon sa panghitabo.
Si Kag Tawee ug Dr Andutan ang pulos gipang-patay sa motorcycle in tandem suspects sa wala matino nga mga hinungdan.
