CAGAYAN DE ORO CITY – Gi-tratar sa Cagayan de Oro City Police Office o COCPO nga kabahin na sa ilang trabaho nga usahay dunay dili paborabli nga sitwasyon samtang nagtunol sa batakang serbisyo sa katawhan sa dakbayan.
Kini ang pagpasabot ni City Director Col Henry Dampal tungod sa pagka-suspenso sa pila ka bulan ni COCPO spokesperson Maj Evan Viñas epekto sa silot kaniya sa Ombudsman sa kasong administratibo.
Miingon si Dampal nga nakuha ni Viñas ang maong kaso tungod sa giduso nga reklamo sa private complainant sa Ombudsman sa miaging katuigan.
Giklaro ni Dampal nga igo lamang gipatuman sa Camp Crame ang Ombudsman order hinungdang na-suspenso ug walay madawat nga suhulan ang maong opisyal.
Kasamtangang mihulip una kang Viñas si Lt Col Joel Nacua samtang giserbisyuhan una niini ang mando sa Ombudsman.
Hisayrang gidawat ug hilom na lamang usab nga gisunod ni Viñas ang pagsuspenso kaniya sa serbisyo.
