CAGAYAN DE ORO CITY-Anaa na sa stable nga kahimtang ang panglawas ni Supt Michael John Deloso nga gi-ambush sa motorcycle in tandem suspects sa Luna-Capitol Streets ning syudad.
Kini human gipaubos sa sunod-sunod nga operasyon si Deloso gumikan sa daghang igo sa mga bala gikan sa mga suspetsado gamit ang kalibre 45 ug 9mm pistol kagahapon sa buntag.
Gibutyag ni City Police Director Sr/Supt Nelson Aganon nga pabiling gisuta pa Special Investigation Task Group ang pinakaduol nga motibo sa pagpusil ngadto kang Deloso samtang anaa sulod sa iyang kolor puti nga van kagahapong adlawa.
Kumbinsido si Aganon nga dunay pagdumot ang nagsugo pagpusil kang de Loso.
Kini human halos ihurot sa duha ka suspek ang bala sa ilang mga armas samtang gipusil si Deloso hinungdan nga 12 ka igo ang nahiaguman niini sa iyang lawas ug dagway.
Miingon si Aganon nga dili ordinaryong mga kriminal ang mi-ambush kang Deloso tungod kay na-rekober ang dul-ag 30 ka bakanteng kapsula sa armas.
Giangkon usab ni City Mayor Oscar Moreno nga mibati siya’g alarma sa pag-ambush sa taas nga opisyal sa PNP-10 bisan sa kahayag sa adlaw sentrong bahin sa syudad.
Kini human gimando ni Moreno ang pagtukod sa Special Investigation Task Group o SITG aron mapadali ang pagsulbad sa pag-ambush sa Police Official.
Miingon si Moreno nga angay masulbad sa dali nga panahon ang kaso aron dili kini makahatag sa kalisang sa katawhan nga nanimuyo sa syudad.
