CAGAYAN DE ORO CITY – Naka-floating status una si kanhi Bukidnon PNP Provincial Director Col. Reynante Reyes ubos sa Regional Personnel Holding and Accounting Section sa Police Regional Office 10 sa Camp Alagar ning syudad.
Kini human tangtanga sa iyang posisyon ni PRO 10 regional director Brig Gen Lawrence Coop ug gihulip ang iyang deputy director for operations Police Col. Danildo Tumanda isip officer-in-charge sa Bukidnon PNP.
Miingon si PR0 10 spokesperson Police Maj. Joann Navarro nga normal kanila ang mga pagbalhin sa ilang mga area of assignment rason nga walay isyu sa pag-relib kang Reyes sa katungdanan.
Si Reyes kinsa sobra walo ka bulan nangulo sa Bukidnon PNP ang mitala sa dagko usab nga mga kalampusan bisan sa pipila ka kremin nga natigayon sa miaging mga semana.
Samtang gitahod ni Reyes ang paglangkat kaniya sa katungdanan epektibo ning adlawa.
Kini human imando ni Coop nga direkta nang mo-report si Reyes sa Camp Alagar Headquarters sa syudad.
Miingon si Reyes nga giisip niya nga normal operational matter sulod sa PNP ang pagbalhin kanila sa lain-lain nga area of assignments.
Si Reyes ug Tumanda ang managsama nga produkto sa PNPA class ug dungan nga na-destino sa ilang junior positions ubos sa Cagayan de Oro City Police Office ayha nabalhin sa lain-lain nga area of assignments dinhi sa rehiyon.
