“Appeal to emotion”, pagpamulitika ug “grasping at straws” — mao kini ang paghulagway ni Human Rights Lawyer Atty. Neri Colmenares sa panapos nga argumento nga gipresentar ni Atty. Nicholas Kaufman, lead counsel sa depensa, sa ika‑upat ug katapusang sesyon sa Confirmation of Charges batok ni kanhi Presidente Rodrigo Duterte sa International Criminal Court (ICC).
Namahayag si Colmenares nga huyang ug walay unod ang depensa ni Kaufman, busa kini gi‑divert ngadto sa mga pakilooy nga pahayag nga tigulang na si Duterte ug nga daghan siyang nabuhat para sa katawhan sa Pilipinas.
Alang kang Colmenares, kini nga klase sa argumento mahimong ikatandi sa posibleng pahayag ni Adolf Hitler kung buhi pa kini karon, kay tataw nga naningkamot siya nga ipahimulos ang emosyon inay nga ipresentar ang lig‑on nga ebidensya.
Gumikan niini, kumbinsido si Colmenares nga makasuhan ug mataral sa hukmanan si Duterte human sa 60 ka adlaw nga pag‑review sa mga hurado sa ICC.
Ang proseso sa Confirmation of Charges mao ang kritikal nga lakang aron mahibal‑an kung adunay igo nga basihanan sa kaso nga may kalabotan sa extrajudicial killings ug war on drugs nga gi‑angkon nga nahitabo sa panahon sa administrasyon ni Duterte.
