CAGAYAN DE ORO CITY – Gigamitan ni Olympian boxer Carlo Paalam sa 70 porsiento nga kalantip salabautan ug laing 30% nga kusog ang unang pakigsangka niini sa boksing batok Irish boxer nga si Jude Gallagher sa 57 kilos nga timbang sa Paris,Pransya kagabii.
Kini ang pagtug-an sa Cagayan de Oro pride boxer dihang nasakmit niya ang kadaugan batok Irish boxer via unanimous decision aron maka-abante sa quarterfinals sa Agosto 3.
Miingon si Paalam nga angayang mogamit sa mga diskarte nga dili mabasa sa mga kaatbang aron kalikayan nga ma-alkontrahan samtang anaa sa pakig-away sulod sa boxing ring.
Dili bag-o ang pakigharong ni Paalam kang Gallagher kay daghang higayon na nga nagka-sparring na sila samtang ubos pa sa Olympic qualifying tournament ayha nakasulod sa Paris Olympics.
Hisayrang tulo na lang sa lima ka boxing contenders gikan sa Pilipinas ang mopadayon sa misyon pagsakmit sa medalyang bulawan kay napakyas na sila pag-abante sila Eumir Marcial ug Hergie Bacyadan kay pulos pildi sa ilang mga away kagahapong adlawa.
