Gikalipay sa Commission on Elections (COMELEC) Region 10 nga milapas na sila sa 5 porsyento nga minimum target sa pagparehistro sa mga wala pa nakarehistro nga botante kumpara sa miaging tuig.
Sumala ni COMELEC Region 10 Director Renato Magbutay, kon ibase sa kapin tulo ka milyon nga rehistradong botante sa rehiyon, target unta nila ang 150 mil ka bag-ong aplikante apan niabot na kini sa dul-an 200 mil ka aplikasyon.
Giingon niya nga nagpasabot kini nga dako ang interes sa katawhan sa pag-apil sa umaabot nga Barangay ug Sangguniang Kabataan Elections.
Dugang pa niya, posible usab nga nagtinguha ang mga lumulupyo og kabag-ohan sa liderato sa ilang tagsa-tagsa ka barangay.
Busa, nagpadayon ang COMELEC sa pagdawat sa mga aplikante hangtod sa gitakdang petsa sa voter registration.
Gi-awhag usab sa komisyon ang mga kwalipikadong wala pa makarehistro nga magpahimulos sa nahibiling mga adlaw sa pagparehistro.
