Gipasalig sa Commission on Elections (COMELEC) Region 10 nga walay problema sa pwersa sa mga magtutudlo nga maoy magdumala sa umaabot nga Barangay ug Sangguniang Kabataan Elections.
Apan gikinahanglan pa nga magpahigayon og refresher course ang mga magtutudlo aron mas lig-on ang ilang kahibalo sa pagdumala sa maong eleksyon.
Matod ni COMELEC Region 10 Director Renato Magbutay, igo ang gidaghanon sa mga teachers nga mahimong electoral board personnel sa rehiyon.
Hinuon, iyang giingon nga importante nga mahatagan sila og seminar aron ma-update ang ilang kahibalo, ilabi na kay naanad ang kadaghanan sa automated elections.
Dugang pa niya, lahi ang pamaagi, lagda ug regulasyon sa manual elections nga gamiton sa barangay ug SK elections kumpara sa automated voting system.
Busa giandam sa komisyon ang mga pagbansay aron masiguro nga hanas ug andam ang mga magtutudlo sa adlaw sa piniliay. Nagtuo usab ang COMELEC nga pinaagi niini mamintinar ang hapsay ug matinud-anong proseso sa eleksyon.
