CAGAYAN DE ORO CITY-Gipanganti sa Comelec-10 nga dili makalingkod ug makasulod sa ilang opisina ang 80 ka kandidato nga midaug sa pagka-sangguniang kabataan o SK nga nakalapas sa probisyon sa bag-ong SK reform law.
Sumala ni Comelec regional director Atty Renato Magbutay nga ilang babagan nga makasulod sa opisina ang mananaug nga SK chairmen nga over-age hangtud dili moabot ang desisyon sa central office sa kaso nga ilang gipasaka.
Apan gitin-aw ni Magbutay nga dili pa disqualified sa maong posisyon ang 80 ka kandidato hangtud wala pay pormal nga desisyon ang central office.
Dugang pagtin-aw ni Magbutay nga bisan gi-proklamar na nga mananaug sa ilang ahensya ang usa ka SK chairman, mahimo gihapon nila kini nga wad-on sa pwesto.
Si Magbutay miingon nga ang proklamasyon nagpasabot lamang nga midaug siya sa maong piliay human makakuha sa taas nga boto.
Asoy niini nga maoy lisod tanggalon tungod kay moagi pa sa taas nga proseso ang SK chairman nga nakapanumpa na sa iyang katungdanan apan mag-atubang usab sa kasong kriminal.
