CAGAYAN DE ORO CITY – Gibulgar sa beteranong magsisibya sa radyo nga si Jonas Bustamante ang pasangil nga sekretong nagtigom ang pipila ka election officers sa Comelec-Misamis Oriental ug giingong dakong opisyal sulod sa usa ka hotel ning syudad.
Gipamugos niini nga subay sa nahuptan niya nga mga impormasyon nga anaa sa usa ka lawak sa hotel ang maong Comelec municipal election officers ug kabalak-an kay giingong anaa ang kolor puti nga sakyanan sa kasamtangang mayor sa dakbayan.
Kini ang rason nga gibulgar niya ang maong impormasyon aron mahatagan sa higayon ang Comelec nga tin-awon ang maong isyu.Hisayrang si Bustamante kanhi usab opisyal sa brgy sa lungsod sa Opol ning lalawigan.
Dugtong niini,gitawag nga iresponsabli ni Comelec-Misamis Oriental Provincial Election Supervisor Atty. Carlito Ravelo ang magsisibya nga si Bustamante.
Kini tungod sa pasangil nga hilom nga katiguman sa pipila sa iyang municipal election officers sa usa ka hotel ning syudad sa miaging semana.
Namahayag si Ravelo nga tinood nga adunay pagpatabang sa iyang municipal election officers kang City Election Officer Atty. Ramil Acol kabahin sa pagdumala sa vote canvassing kung mahuman na ang piliay sa Mayo 12 ning tuiga.
Siya miingon nga imposible ang pasangil ni Bustamante kay mga Comelec officers sa Misamis Oriental ang iyang gipang-akusahan nga klaro nga walay labot sa pagdumala sa eleksyon sa dakbayan ugmang adlawa.
