Temporaryong gibalhin sa mga malls sa Cagayan de Oro ang voters registration sa COMELEC aron mapaduol ug mapadali ang serbisyo sa publiko. Kini ang giingon ni Atty. Renato Magbutay, Regional Director sa COMELEC Region 10, sa iyang interbyu sa Bombo Radyo.
Matod ni Magbutay, gamay ang opisina sa lungsod ug naglisod kini sa pag‑accommodate sa daghang botante. Busa, giuyonan sa mga election officers ang pagbutang sa registration sa uptown para sa first district ug sa downtown para sa second district.
Iyang gipasabot nga aprobado na ug karon nag‑operate na ang maong setup sa mga malls. Giingon pa niya nga makatabang kini aron malikayan ang taas nga linya ug mas mapaspasan ang proseso sa rehistrasyon.
Gawas pa niini, nag‑andam ang COMELEC og mas lapad nga lugar ug hapsay nga sistema aron maatiman ang daghang aplikante nga muapas pa sa katapusang hugna sa rehistrasyon.
Ang voters registration magpadayon hangtod Mayo 18 ug gilauman nga mas daghang botante ang makabenepisyo sa mas accessible nga serbisyo.
