CAGAYAN DE ORO CITY – Gihagit sa Commission on Elections o Comelec ang kusog mang-reklamo kabahin sa ‘vote buying’ nga tinud-anay motabang sa kagamhanan aron mahatagan na sa pagkasumpo ang suliran nga kada-lusad na lang sa piliay sa nasud mopatim-aw.
Kini ang mensahe ni Comelec 10 regional director Atty. Renato Magbutay nunot sa mikatag na usab nga mga impormasyon nga naghinobra ang pinalitay sa mga boto sa pipila ka mga kandidato ngadto s mga botante aron masiguro ang ilang kadaugan sa Mayo 12 nga piliay.
Miingon si Magbutay nga walay kapuslanan bisan kung mapuno pa sa reklamo apan kung walay lig-ong mga ebedensiya ug kutob lang sa singudanan ang mga reklamante,malabay lang gihapon sa basurahan ang kaso nga dunggon sa korte.
Siya miingon nga kung adunay gusto mahunong ang isyu sa vote buying,nag-una na niini nag-interes ang Comelec apan kung walay interes ang katawhan nga hatagan kini sa tinud-anay nga sulbad magpabiling binastuson sila sa mga kandidato nga nagsalig lang pagpamalit sa boto.
Dumduman nga dunay mikatag nga video footages nga naglinya ang mga tawo sa pipila ka bahin sa syudad kay gitoohan nga gisugdan na pagpanghatag ang ‘ulan-ulan gikan sa mga dagkong mga kandidato.
Nagkadaiyang kantidad sama sa 2-mil,3-mil,4-mil ug 6-mil pesos ang mikatag sa social media nga giingong pinalitay sa mga boto sa pipila ka mga kandidato sa ngadto sa mga botante ning syudad.
Apan ang maong mga pasangil ang gihimuan pa’g imbestigasyon sa Cagayan de Oro City Police Office subay sa kasuguan sa Comelec nga nagtukod pagtuyo sa Committee on Kontra Bigay aron maoy motutok sa maong isyu.
