CAGAYAN DE ORO CITY – Dili angay mo-reklamo pa ang katawhan kung giunsa pagpadagan sa mga nagdumalang mga opisyal ang gobierno.
Kini kung gibaligya sa katawhan ang ilang mga boto bugti sa kantidad ngadto sa mga politiko nga mipalit sa ilang pagkatawo.
Gihimo ni Atty. Gina Sabio,regional lawyer sa Commission on Elections ang pagpadumdom nunot sa kanunay’ng balik-balik nga reklamo sa isyu sa vote buying-selling sa matag-pahigayon sa piliay sa nasud.
Miingon si Sabio nga hangtod nga dili ihunong sa mga botante ang pagbaligya sa ilang mga kaugalingon,dili usab maundang ang lapad nga pagpalit sa mga politiko sa lang mga boto nga dakong puwersa nga makapasamot pagut-ot sa kahimtang sa Pilipinas ug kalidad sa serbisyo sulod sa kagamhanan.
Samtang gihagit sa grupo sa National Citizens’ Movement for Free Elections (NAMFREL) nga tas-an sa mga botante ang ilang sukdanan sa mga kandidato nga angay ibutang sa posisyon pinaagi sa May 12 elections.
Gihimo ni NAMFREL-Misamis Oriental chapter Nestor Banuag Jr ang pasidaan nunot sa naghinobrang gahom sa social media diin nagkatag ang nagkadaiyang mga bakak nga impormasyon kabahin sa mga kandidato.
Gibutya ni Banaug nga hangtod nga magpa-ulipon ang katawhan sa ubos nga sukdanan sa pagpili sa mga kandidato,wala na’y lauman nga makabadbad pa sa gapos gikan sa daghang suliran ang Pilipinas.
Hisayrang kabahin ang NAMFREL nga walay hunong sa ilang voters education campaign sa tuyo nga makamugna’g kausaban sa kasamtangang political landscape sa nasud.
