CAGAYAN DE ORO CITY – Gigarantiya ni Commission on Elections 10 regional director Atty Renato Magbutay nga anaa sa 98 porsiento nga ‘functional’ ang ilang gamiton nga automated counting machines o ACMs sa lima ka probinsya sa May 12 elections.
Kini resulta sa gihimo nga pinal nga pagsusi sa mga makina diin gipang-selyuhan na aron luwas nga magamit sa board of election inspectors sa piliay sunod semana.
Miingon si Magbutay nga 95 porsiento na usab sila nga andam kauban ang tanang deputized govt agencies alang sa 2025 midterm elections dinhi sa Northern Mindanao region.
Samtang naka-full deployment na ang Police Regional Office 10 sa ilang sobra 12-mil ka puwersa alang sa paghatag sa luwas nga seguridad sa mga magtutudlo ug mga botante molambigit sa May 12 elections.
Kini human isulti ni PRO 10 spokesperson Major Joann Navarro nga gatos-porsiento nang andam sa pagpatuman sa security implementation plan aron kab-uton sa rehiyon ang ‘zero violence’ nga kagustuhan sa Kampo Krame sa sunod semana nga piliay.
Miingon si Navarro nga gawas sa sobra 9-mil nila ka pulis,mipuno usab sa dugang 3-mil ka tropa ang Philippine Army ug Philippine Coast Guard aron masiguro ang kamalinawon sa pagbotar sa katawhan.
Gikatag na usab sila ang ilang laing mga pulis nga magsilbing special election board members sa pipila ka lungsod sa Lanao del Norte.
