CAGAYAN DE ORO CITY – Ipaubos sa pag-rebyo sa Comelec-Law Department ang findings ug rekomendasyon sa pasangil sa usa ka abogado nga nalambigit sa ‘vote buying’ si kanhi Camiguin Gov Maria Luisa Romualdo ug laing napulo pa niadtong 2016 presidential elections.
Kini human dunay nakit-ang basehan si Gingoog City Election Officer Atty Dexter Nagtalon sa giduso nga reklamo ni Atty Homer Mabale batok sa grupo ni Romualdo.
Namahayag si Comelec regional director Atty Reynato Magbutay nga i-agi pa sa preliminary investigation o PI sa ilang law department aron sutaon ang kalig-on sa mga ebedensiya sa maong reklamo.
Gawas kang Romualdo,gusto usab pakasuhan ni Nagtalon sila si Mahinog Mayor Rogerio Acle, Rey Lawrence Tan, Kindred Jajalla, Shella Babanto, Ramil Bayucot, Neolida Salon;Winlove Labadan ug laing tulo ka sibilyan.
Una usab niini,kusganong gihimakak ni Romualdo ang tanang pasangil ni Mabale batok kaniya ug namugos nga wala malambigit sa pagpamalit sa mga boto sa katawhan sa Camiguin.
