CAGAYAN DE ORO CITY – Gi-depensa sa Commission on Elections o Comelec kon nganong nahurot pagpaubos sa hot spot category ang mga lugar sa Mindanao.
Miingon si Comelec spokesperson James Jimenez nga ang maong lakang nagsumikad sa rekomendasyon gikan sa militar ug kapolisan nga dunay lapad nga kasayuran sa kahimtang sa seguridad dinhi sa rehiyon.
Dugang ni Jimenez nga mahimong walay pulos kung ang usa ka lugar lamang ang ilang ideklarar nga hatagan sa pagtagad kay dali lamang makatabok ang giingong ‘spill over’ sa kasikbit nga dapit.
Samtang gitin-aw sa Police Regional Office o PRO-10 nga dili angayang kabalak-an sa pagkabutang sa Mindanao sa kategoryang hot spot sga nagkadool nga 2019 midterm elections sa nasud.
Sa pakighinabi sa Bombo Radyo, gibutyag ni PRO-10 spokesperson Police Supt Surki Serenias nga usa lamang ka pre-emptive prevention ang tumong sa pagpaubos sa Mindanao sa red election hotspots aron maseguro nga magmalinawon ug magmalampuson ang piliay.
Dugtong niini,may himoon nga adjustments ang kapulisan sa ilang himoong pagpangandam sa nagkadool nga election.
Una nang gikumpirmar ni Comelec spokesperson James Jimenez nga base sa rekomendasyon sa Philippine National Police ang pagpaubos sa Mindanao sa hot spot.
