CAGAYAN DE ORO CITY – Giklaro sa task force nga gitahasan ni Comelec chairman George Garcia nga wala sila’y gahom aron mangunay pagduso’g kaso batok sa mga tawong adunay kalabutan sa kuwestiyonableng pagsaka sa mga botante sa Brgy Carmen ning syudad.
Miingon si Comelec 10 asst regional director Atty Maria Dulce Banzon nga gitahasan lang sila sa pagkuha sa gikinahanglang mga impormasyon sa maong isyu ug gilayon nila kini isaka sa buhatan sa kauluhan.
Siya miingon nga dili kinahanglanon nga magpasar pa’g laing balaod kabahin sa eleksyon kay dugay na nga naglihok ang regulasyon niini nga gisupak lang sa pipila ka tawo.
Dugang ni Banzon nga kon gisunod pa lang unta ang gabayan sa pagdawat sa mga rehistrante,dili mag-atubang sa oposisyon ang katawhan ug mga opisyal sa maong brgy.
