CAGAYAN DE ORO CITY – Gikompirmar sa commercial hog raisers o negosyante sa mga baboy nga nabati na nila’g sugod ang epekto sa ilang kinitaan dinhi sa rehiyon.
Kini tungod sa pagsulod sa African Swine Fever o AFS sa Pilipinas diin naghatag sa sayop nga pagtoo sa publiko nga makahatag sakit ang pagkonsumo sa karne nga kontaminado sa maong balatian sa baboy.
Miingon si Bobby Uy kinsa tag-iya sa usa ka commercial hog farm ning lalawigan nga anaa lamang sa 95 gikan sa 100 pesos kada-kilo ang palit sa mga karneng baboy sukad misulod ang AFS sa nasud.
Namahayag si Uy nga unta likayan una sa backyard hog raisers ang pagbahog sa lamaw ngadto sa mga baboy nga hayan makapasamot sa pagkatag sa kagaw.
Samtang gisugdan na’g balibad sa Cebu province ang pagpasulod sa live animals nga gikan sa commercial ug backyard hog raisers dinhi sa rehiyon.
Kini human naniguro ang maong lugar nga dili usab sila masudlan sa African Swine Fever nga unang miigo sa Rizal ug Bulacan.
Miingon si Dr Leo Mira,head sa Bureau of Animal Industry Veterinary Quarantine Service nga gusto sa taga- Cebu nga magbaton una ang hog raisers sa dugang bio security measures ayha makasulod ang mga produkto niini gikan sa rehiyon.
Gihupay usab ni Mira ang publiko nga dili makatakod sa tawo ang maong sakit apan gidiskorahe niini nga dili na lamang mokaon sa karneng baboy kon kini mag-positibo sa ASF.
