CAGAYAN DE ORO CITY – Gisigundahan sa kampo ni ABC-Cag de Oro Chapter president Kag. Marlo Tabac ang sugyot ni committee on blue ribbon vice chairman Kag. Roger Abaday nga mosulod sa amicable settlement ang mga reklamante nga nanumbong kaniya sa konseho.
Kini tungod aron dili sila mapugos sa pagduso’g contempt of court batok sa utok ug mga tawo nga gigamit nga magsilbing mga reklamante kang Tabac sa nagkadaiyang buhatan sa gobierno.
Miingon si Atty Dale Bryan Mordeno,abogado ni Tabac nga adunay igo pa nga panahon aron makahuna-huna ang mga tawo nga gipanggamit sa iyang mga kaubang kapitanes kung angay mopadayon sa ilang pag-ipit kaniya.
Gisaysay ni Mordeno nga nalooy sila sa pipila ka empleyado sa Brgy Gusa nga gigamit mga kaatbang ni Tabac apan walay kasiguruhan kung hangtod kanus-a mahatagan sa seguridad ug tabang-legal.
Hisayrang gawas sa konseho,susamang reklamo batok Tabac ang nasang-at sa Liga-National ug Office of the Ombudsman.
