CAGAYAN DE ORO CITY – Dili ‘self-serving’ ang ikaupat nga impeachment complaint nga hinan-ay sa kamarabaha aron maoy ipasaka batok Vice Pres. Sara Duterte didto sa senado.
Kini ang tubag ni Misamis Oriental 2nd District Cong. Bambi Emano sa pangutana sa Bombo Radyo kon nganong sa upat ka impeachment complaints,ang gikan sa kamara ang miani’g 240 ka pirma sa mga kongresista aron taralon si Inday Sara gamit ang dul-an napulo ka articles of impeachment.
Miingon si Emano nga mismo sila nga mga magbababalaod ang mihimo’g imbestigasyon sa isyung paggamit ni VP Sara sa iyang confidential funds nga nag-resulta sa daghang impormasyon nga basehan sa pito ka pasangil nga angay tubagon niini sa impeachment court.
Una nang giklaro sa kongresista nga dili kumbinsido ang mga unod ug wala maplastar pag-ayo ang tulo ka impeachment complaints hinungdan nga mas nakalusot ang 4th impeachment aron ipapanubag ang bise-presidente sa senado.
Hisayrang sa 240 ka magbabalaod nga mi-indorso sa impeachment kontra VP Sara,12 gikan sa 14 ka kongresista sa Northern Mindanao ang mipirma niini sa miaging semana.
