CAGAYAN DE ORO CITY – Giuyunan ni Congressman Bambi Emano sa segundo distrito sa Misamis Oriental nga gipaduso’g courtesy resignation ni Pres Bongbong Marcos ang tanang senior police officers gumikan sa isyu sa ilegal nga droga.
Miingon ang kongresista nga dili dautan ang gihimo ni DILG Secretary Benjamin Abalos Jr apan mas nabutang pa gani sa peligro ang kinabuhi niini ug sa iyang pamilya kay segurado nga daghan nangasuko batok kaniya.
Apan maoy kahingawa ni Emano nga unta klaro nga suportado sa lig-ong ebedensiya ang mga akusasyon ngadto sa mga pulis nga gipang-akusahan.
Kini aron dili masumbalikan ang 5-man panel investigators nga sugu-on ni Marcos pag-imbestigar batok sa sobra 900 police generals ug koronels.
Sukad sa pagsilbing mayor sa lungsod sa Tagoloan ug naglingkod usab isip gobernador,kanunay’ng suportado ni Emano ang PNP sanglit kaabag kini niya sa pagmintinar sa kahusay’g kalinaw sa Misamis Oriental.
