CAGAYAN DE ORO CITY – Gitugyan na sa liderato sa Kamara de Representantes sa committee on rules ang gipalanog nga isyu ni Misamis Oriental 1st District Congresswoman Atty. Jennifer ‘Karen’ Lagbas kabahin sa Medical Assistance for Indigent and Financially Incapacitated Patients/MAIFIP Program ilabina sa mga pribadong ospital sa nasud.
Kini human gika-alarma ni Lagbas ang nagkaylap nga mga pagbalibad sa ‘guarantee letters’ nga gikan sa Department of Health/DoH aron lang maatiman ang mga pasyente ug dili balibaran bisan walay ikabayad kung makadangop sa mga pribadong balay-tambalanan.
Siya miingon nga angayang mahimuan sa imbestigasyon ang maong isyu aron masuta kung asa ang kakulangon ug kung unsay angay pang buhaton sa kagamhanan sa tuyo nga kalikayan nga subli mahitabo ang susama nga suliran sa pagligid sa panahon.
Gisampit sa kongresista nga sulod sa Northern Mindanao,anaa sa 89-mil 112 ka pasyente ang nagbaton sa aprobadong guarantee letters sa tuig 2024, apan 5 porsiento ra ang naapil sa professional fees ug 28 hangtod 30 porsiento lang sa mga doktor ang midawat niini.
Nagkahulugan nga daghan sa mga pribadong ospital ug mga doktor ang wala mohatag sa pagtagad niini taliwala nga sulod kini sa programa.
Dugang ni Lagbas nga bisan ang Private Hospitals Association of the Philippines/PHAPi ang miundang na sa pagdawat maong komunikasyon epekto sa sobra 530 milyones pesos ang pakyas pa mabayran sa kagamhanan.
Kini ang rason nga gihinusgan sa kongresista nga matutukan ang isyu aron marebyo ug masusi’g balik ang mga mibuthong problema nga dakong babag mahatag ang batakang-serbisyo.
Gihingusgan ni Lagbas ang pagtutok niini kay dili lang kini suliran sa iyang mismong distrito apan lukop ang tibuok nasud-Pilipinhon sa maong isyu.
