Gipamatud‑an ni Cagayan de Oro 1st District Representative Lordan Suan nga wala siya’y gikilingan nga politikanhong panan‑aw, kondili nagsubay lamang sa balaod human mapili isip usa sa mga prosecutor sa impeachment trial batok kang Vice President Sara Duterte.
Tataw nga giingon ni Bert Amplayo, assistant district director sa opisina ni Cong. Suan, nga dugay nang gilauman nga mahimong kabahin ang kongresista sa prosecution panel, ilabi na nga aktibo kini sa mga hearing sa House Committee on Justice nga may kalabotan sa impeachment complaint.
Butyag ni Amplayo nga isip miyembro sa Integrated Bar, adunay obligasyon si Cong. Suan nga tumanon ang iyang panumpa isip abogado ug sundon ang legal nga proseso sa maong kaso.
Busa, wala kini nagpasabot nga adunay personal o politikanhong pagdumot batok sa Bise Presidente, kondili kabahin lamang sa iyang responsibilidad isip mambabalaod ug abogado.
Giingon usab ni Amplayo nga ang pagpili kang Cong. Suan sa prosecution panel resulta sa pagsalig sa iyang kaalaman ug kapasidad isip abogado sa Kamara.
Nagpasabot kini nga ang pag‑apil ni Cong. Lordan Suan sa impeachment trial nakabase sa constitutional duty ug legal nga proseso, ug dili sa partisanong politika.
