CAGAYAN DE ORO CITY-Gipaboran ni Cagayan de Oro 2nd District Representative Maximo Rodriguez ang constitutional assembly o con-ass nga paagi sa pag-amendar sa Batakang Balaod itandi sa constitutional constitution o Con-con.
Kini sa pagtoo nga mas makadaginot ang nasud ug mas paspas ang himoong pagtuki niini sa mga magbabalaod.
Giangkon ni Rodriguez nga una niyang gipaboran ang Con-con apan nausab ang iyang baruganan ug maoy gisuportahan ang Con-Ass nga gipaboran sa House of Representatives.
Giawhag usab ni Rodriguez ang katawhan sa Mindanao nga suportahan ang sistema nga pederalismo sa nasud.
Siya miingon nga maoy mabulahan sa bag-ong sistema sa pang-gobyerno ang mga residente sa Mindanao ilabina nga daghang benepisyo ang makuha niini.
Hisayran nga ubos sa federalism goverment mas dali nga molambo ang atong nasud ug sulbad sa kalisod.
Samtang gitin-aw ni constitutionalist Atty Antonio “Tony” La Viña nga dili angayang himoon nga rason sa Kongreso nga mas makadaginot ang nasud sa constitutional assembly nga paagi sa pag-amendar sa Batakang Balaod itandi sa conventional constitution.
Gibutyag ni Atty La Viña nga mismo si Sen Loren Legarda nga chairman sa Committee on Finance ang nagkumpirmar nga daghang kwarta ang nasud aron gamiton nga pondo sa himoong pag-amendar sa Batakang Balaod.
Sya nagtoo nga mas maayo ang constitutional constitution tungod kay makita dinhi ang legitimacy.
Miangkon usab si La Viña nga pabor siya sa pederalismo nga sistema sa nasud.
Apan iyang gihangyo ang mga magbabalaod nga tarongon ang pag-ebalwar sa mga balaod nga angayang idugang ug balaod nga angayang kuhaon sa Batakang Balaod.
Mas maayo matud pa nga hunahunaon sa mga magbabalaod ang kaayohan sa mga katawhan sa umalabot katuigan ug dili ang ilang mga personal nga interest.
